Umunsi Mpuzamahanga w'abantu bafite ubumuga mu Karere ka Gasabo wizihirijwe mu Murenge wa Rutunga.
Insanganyamatisko y'uyu mwaka: Kuzamura Uruhare rw'abantu bafite Ubumuga mu miyoborere  twubaka Ejo Heza.
Umuyobozi Nshingwabikorwa w'Akarere ka Gasabo Bwana BAYASESE Bernard ari kumwe n'Intumwa ya Rubanda Hon. Mussolini Eugene hamwe n'Umuhuzabikorwa  w'Inama y'Igihugu y'abantu bafite ubumuga ku rwego rw'Umujyi wa Kigali bifatanyije n'abaturage bo mu Murenge wa Rutunga .
Hizihizwa uyu munsi habayemo igikorwa cyo kuremera abatishoboye bafite ubumuga bamwe bahabwa amafaranga azabafasha kwiteza imbere. Abandi bahabwa inyunganirangingo   zizabafasha, n'aho abandi borojwe inka.
Mu ijambo rye, Umuyobozi Nshingwabikorwa w'Akarere  yavuze ko kwizihiza uyu munsi bidufasha kuzirikana ku burenganzira bw'abantu bafite ubumuga bakwiye kugira mu muryango, ni ukubaha agaciro, ni ukubagaragariza ko bafite uburenganzira n’ubushobozi nk’abandi banyarwanda bose mu guteza Igihugu cyacu imbere
Umuyobozi kandi yababwiye ko muri gahunda ya Guverinoma y’imyaka itanu yo  kwihutisha iterambere (NST2) hateganyijwe ko kwita ku bantu bafite ubumuga bifatwa  nk’ikibazo gikwiye kwitabwaho n’inzego zose.
Asaba buri wese gukuraho inzitizi ku bantu bafite ubumuga ndetse nabo tubakangurira guharanira iterambere, kwitabira gahunda za Leta zo kwikura mu bukene, bakiyumvamo ubushobozi, n’Icyizere kandi abasaba gufasha  abayobozi kugera ku ntego, n’Icyerecyezo cy'Igihugu cy'igihe kirambye (2050) dutekereze byagutse, twiyumvamo gukora nk’ababazwa inshingano ndetse no gukomera k’Ubumwe bw’Abanyarwanda

Umushyitsi mukuru muri uyu muhango Honorable Mussolini Eugene, yashimye cyane Leta y'u Rwanda yo yashyizeho itegeko rusange ry'abantu bafite Ubumuga riha uburenganzira abantu bafite ubumuga kugira uburenganzira nk'abandi bantu. Yanashimiye kandi gahunda nshya yo kubarura abantu bafite ubumuga n'icyo buri muntu akeneye bitewe n'ubumuga afite.  Yongeye gusaba abantu bafite abana bafite ubumuga kutabahisha inyuma y'inzu ahubwo akwiye kwegera ubuyobozi bumwegereye kugira ngo afashwe nawe agire uburenganzira nk'abandi bantu. Yashimiye kandi Nyakubahwa Perezida wa Repabulika wemeye ikibazo cy'abantu bafite ubumuga bw'uruhu akaba yaremeye ko bajya bahabwa amavuta ku buntu.