Uyu munsi Akarere ka Gasabo bibutse  ku nshuro ya 31 Abana n''Abagore bazize  Jenoside yakorewe Abatutsi mu 1994. Igikorwa cyabereye mu Murenge wa Nduba Akagari ka Sha.

Umuhuzabikorwa w'Inama y'Igihugu y'abagore ku rwego rw'Akarere yashimye ubutwari bw'Inkotanyi zarokoye u Rwanda.

Yashimye kandi ubutwari bw'Abagore bishwe n'abarokotse kuko iyo wumvise amateka ya Jenoside yakorewe abatutsi abagore bose basabaga ko babica mbere yo kubicira abana imbere n'ubwo ariko byagendaga .

Yasabye kandi ababyeyi gukuramo  abana  ingengabitekerezo ahubwo bakabigisha indangagaciro z'abanyarwanda.

Yashimye abanyarwanda batahigwaga icyo gihe babaye abaturage barangwa n'indangagaciro nyarwanda.

Mu kiganiro yatanze, Bwana Mudaherenwa Regis yagarutse ku mateka mabi yaranze  u Rwanda kuva ku bukoroni, u Rwanda rubona ubwigenge , kugeza kuri Jenoside yakorewe Abatutsi naho u Rwanda rugeze ubu.

Asaba Abana n'Urubyiruko  kutumva ibyo ababyeyi babo bagifite Ingengabitekerezo ya Jenoside bababwira ahubwo bagakurikiza gahunda nziza Leta y'Ubumwe ibakangurira.

Mu ijambo rye Umuyobozi Nshingwabikorwa w'Akarere Bwana Bayasese Bernard  yavuze ko Ababyeyi bibukwa uyu munsi ku nshuro ya 31 bari ababyeyi bahekeye u Rwanda, ko kutabibuka byaba atari iby’I Rwanda;

Avuga kandi  ko Kwibuka abagore n’abana bishwe muri Jenoside yakorewe Abatutsi mu 1994 bituma dutekereza ku bugome ndengakamere Jenoside yakoranywe no kurushaho gushyira imbaraga mu kurandura burundu ingengabitekerezo yayo.

Ni ugutanga ubutumwa ku bakiri bato kuko bagomba gusobanurirwa neza amateka yaranze Igihugu cyacu, bagatozwa kubaha ikiremwamuntu ntavangura iryo ari ryo ryose, bikabafasha gushyira imbere indangagaciro na kirazira, bakarangwa n’umuco wo gukunda Igihugu;