Umunsi Mpuzamahanga w'umugore wo mu cyaro wizihizwa  buri taliki ya15 Ukwakira wizihijwe hirya no hino mu Mirenge. 

Ku rwego rw'Akarere wizihirijwe mu Murenge wa Gikomero Akagari ka Munini.

Insanganyamatsiko yuyu mwaka igira iti: Umugore ni uw’agaciro.

Hizihizwa uyu munsi abagore bamuritse  ibikorwa bitandukanye bakora bigaragaza aho bavuye naho bageze.

Umwe mu bitabiriye umunsi w'umugore wo mu cyaro, Murererehe Donatha umuyobozi wa Koperative Imboni ikora umurimo w'ubuhinzi mu Murenge wa Gikomero yasobanuye uburyo nk'abagore bo muri uyu Murenge muri 2018 batangiriye  ku mafaranga 200 nk'umugabane nshingiro wa buri munsi ubu bakaba bageze ku  kuri miliyoni enye.

Mu ijambo rye , Umuyobozi Nshingwabikorwa w'Akarere yibukije abagore ko Igihugu kibafata nk’abantu b’agaciro abasaba kugira ibyo bakosora no gufatanya n'Ubuyobozi gukemura bimwe mu bibazo dufite birimo: 

-Ubuzererezi bw’abana, inda ziterwa abangavu, amakimbirane mu muryango, urubyiruko rudashaka gukora ahubwo rwishora mu biyobyabwenge, umwanda mu ngo n'ibindi bibangamiye umudendezo w'abaturage

Umuyobozi w'Umujyi wa Kigali wungirije ushinzwe Ubukungu n'Imibereho y'abaturage, yavuze  ko kuba "Umugore ari uw’agaciro.”

atari amagambo gusa ahubwo ari ubutumwa bukomeye butwibutsa ko agaciro ku mugore ari ibikorwa bigaragaza uburyo ari ku isonga mu iterambere. U Rwanda ruri mu bihugu byabigizemo uruhare rugaragara, ruyobowe n’Ubuyobozi bwiza bwashyize imbere umugore nk’umutima w’iterambere. Niyo mpamvu uyu munsi ari umwanya wo gushima intambwe imaze guterwa no gukomeza gutekereza ku cyakorwa kugira ngo hatagira mugore n’umwe usigara inyuma.

Yavuze kandi ko Umugore wo mu cyaro ari umutima w’ubukungu bw’Igihugu. Ni we uhinga ibidutunga, akita ku muryango, akita ku bidukikije, kandi akagira uruhare rukomeye mukubaka ejo hazaza h’Igihugu.

Igikorwa cyashojwe n’ubusabane.