Uyu munsi ku italiki ya 25 Mata 2025 hizihizwe Umunsi mpuzamahanga wo kurwanya Malariya. Ku rwego rw'Igihugu ukaba wizihirijwe mu Karere ka Gasabo Umurenge wa Ndera mu Kagari ka Kibenga.

Insanganyamatsiko y'uyu mwaka: Kurandura Malaria bihera kuri njye

Igikorwa cyo Kwizihiza umunsi Mpuzamahanga wo ku rwanya Malaria wabanjirijwe no  Gusura Ibikorwa bitandukanye birimo;  uburyo umubu wororoka,  kugaragaza uburyo bukoreshwa mu kwirinda  indwara ya Malaria,

Basoreza ku cyiciro cy'Abajyanama b'ubuzima, berekana Ibikorwa bitandukanye bakora bafasha abaturage kwirinda no kuvura Malaria n'izindi ndwara.

Atanga ikaze  Umuyobozi Nshingwabikorwa w'Akarere ka Gasabo  yashimiye Abafatanyabikorwa b'Akarere ka Gasabo, cyane cyane Abajyanama b’ubuzima ku kazi keza bakora ko gufasha abaturage kandi bakabikorana  ubwitange n’ubunyangamugayo.  Yakomeje avuga ko Ubuyobozi buzirikana kandi bubashimira Inshingano bafite zo gukiza ubuzima bw’abaturage asaba abaturage gukomeza kubagirira icyizere kuko ibyo bakora babihererwa ubumenyi.

Umuyobozi wa RBC yavuze ko kubera ubwiyongere bw'indwara ya Malaria u Rwanda rwashyizeho ingamba zo guhangana na Malaria arizo;   gutera imiti yica imibu, kuvura   Malaria ku Rwego rw'Umudugudu hakoreshejwe abajyanama b'ubuzima, gukomeza gushyira imbaraga cyane mu bukangurambaga no gutanga inzitira mibu.

Umuyobozi kandi yanavuze ko muri uyu mwaka   Leta y'u Rwanda yazanye imiti mishya irwanya Malaria kuko iyari isanzwe ikoreshwa yari itakivura  Malaria neza.