Kwibuka ku nshuro ya 31Jenoside yakorewe Abatutsi mu Murenge wa Ndera byabanjirijwe no gushyira indabo ku nzibutso zishyinguwemo abazize Jenoside yakorewe Abatutsi 1994, urwa Petit Seminaire n'urwa Caraes mu Rwego rwo guha icyubahiro abashyinguwemo.

Umuyobozi Nshingwabikorwa w'Akarere mu ijambo ry'ikaze mu muhango wo Kwibuka ku nshuro ya 31 Jenoside yakorewe Abatutsi yabanje kwihanganisha imiryango yabuze ababo muri Jenoside yakorewe Abatutsi 1994, abasaba  gukomera, no gutwaza muri ibi bihe twibuka abacu, dukomere kuko n’ubwo abicanyi bifuzaga ko Abatutsi bashira, ariko ntabwo umugambi wabo wagezweho twarashibutse. Dufite Igihugu cyiza

Umuyobozi kandi yanagarutse ku mwihariko  w'amateka yo mu Murenge wa Ndera aho tariki ya 11 Mata 1994, abatutsi bari baturutse muri Ndera no mu nkengero zayo  bishwe. Nibwo kandi abasirikare bakomokaga mu Gihugu cy’U Bubiligi bari muri MUNUAR baje mu bitaro bya CARAES/Ndera gutwara abazungu bene wabo; Abatutsi bari bahahungiye  babatakambiye ngo babahungishe babima amatwi, ahubwo bahungisha bene wabo hamwe n’imbwa zabo , basiga abatutsi mu kaga mu maboko y’interahamwe.

 Umushyitsi mukuru mu muhango wo Kwibuka ku nshuro ya 31 Jenoside yakorewe Abatutsi, Senateri Nyirahabimana Sorina yabanje kwihanganisha abarokotse Jenoside yakorewe Abatutsi, abifuriza  gukomera no gutwaza kuko ibyiza biri imbere.

Yavuze kandi ko n'ubwo Jenoside yakorewe Abatutsi yabaye ariko twagize umugisha wo kubona abandi banyarwanda bayihagarika.

Abanyarwanda dukwiye kumenya ko aritwe tugomba kwigira, intambwe nziza tumaze kugeraho mu myaka 31 ishize ni ikimenyetso cyiza kitugaragariza ko tuzagera kuri byinshi

Yibukije Urubyiruko ko aribo Igihugu gihanze amaso