Kwibuka ku nshuro ya 28 Genoside yakorewe Abatutsi mu 1994, muri Ruhanga 
Muri gahunda yo kwibuka ku nshuro ya 28 Genoside yakorewe Abatutsi mu 1994, taliki ya 17 Mata 2022, Hibutswe Abatutsi bazize Genoside baguye kandi banashyinguwe mu rwibutso rwa Ruhanga ruherereye mu Murenge wa Rusororo mu Karere ka Gasabo.
Umuhango wo kwibuka ku nshuro ya 28 Genoside yakorewe Abatutsi mu 1994, witabiriwe n’abayobozi  batandukanye barimo Umunyamabanga wa Leta  muri Minisiteri y’Ubutegetsi bw’Igihugu ushinzwe imibereho Myiza y’abaturage Madam INGABIRE Assumpta akaba yari nawe mushyitsi mukuru.  
Hari kandi n’abagize Komite Nyobozi y’Umujyi wa Kigali, Abagize Inteko Nshinga mategeko imitwe yombi, Umuyobozi Nshingwabikorwa  w’Akarere wungirije  nabandi bayobozi mu nzego zitandukanye.
Urwibutso rw’i Ruhanga kuri ubu rushyinguwemo imibiri hafi ibihumbi 38 rukaba  rwarahoze ari urusengero rw’Abangilikani, hakaba barishwe hari hahungiye baturutse hirya no hino mu mirenge imwe n’imwe igize uturere twa Gasabo, Rwamagana na Kicukiro.
Bamwe mu barokokeye I Ruhanga ndetse hamwe mu bagize Ibuka ku rwego rw’Akarere ka Gasabo, bavuga ko  Abatutsi baje bafite intwaro za gakondo zo kwirwanaho, bazi ko nta muntu uhungiye i Ruhanga ushobora kwicwa kandi koko bakomeje kwitwanaho, kugeza ubwo  izari Ingabo z’u Rwanda (Ex FAR) zifatanyije n’Interahamwe, ngo zaraje zirabarasa zikoresheje indege, zinabatwikisha lisansi imibiri irangirika bikomeye.
Muri uyu muhango wo kwibuka kandi hashyinguwe mu cyubahiro  imibiri Itatu ( 3) yabonetse.
Minisitiri Ingabire Assumpta yavuze ko abashaka kugoreka amateka cyangwa kusubiza inyuma inzira y’Ubumwe n’Ubwiyunge twiyemeje ko twese duhagurukire kubarwanya kuko nta mwanya  bafite.
Ariko yibutsa Urubyiruko ko kugirango rushobore guhangana nabo aruko basobanukirwa amateka y’Igihugu cyabo.
Umuyobozi w’Umujy wa Kigali mw’ijambo rye, yasabye abafite amakuru y’ahari imibiri itarashyingurwa ngo bayigaragaze kugirango dusane imitima, imibiri ishyingurwe  mu cyubahiro  kandi dukomeze inzira y’Ubumwe n’Ubwiyunge.