Kuri uyu wa Gatanu  mu Karere ka Gasabo hateraniye inama yahuje Abagize Komisiyo y’Igihugu ishinzwe Abakozi ba Leta, Ubuyobozi bw’Akarere ndetse nabakozi b’Akarere kuva k’urwego rw’Akagari.

Muri iyi nama, hatanzwe ishusho y’uko imyitwarire mbonezamurimo ihagaze mu Mujyi wa Kigali mu myaka ya 2021, 2022, 2023 na 2024. Byagaragajwe ko hakiri ibibazo bishingiye ku ndangagaciro z’abakozi n’uburyo serivisi zitangwamo. Komisiyo yagaragaje ko hakenewe ingamba zikomeye zo gukemura ibi bibazo, hibandwa ku kwimakaza indangagaciro z’akazi no kunoza serivisi zihabwa abaturage.

Mu bijyanye no gucunga imyitwarire y’abakozi ba Leta, Akanama gashinzwe gukurikirana imyitwarire mibi y’abakozi ba Leta kasobanuye ko iyo umukozi agaragaje imyitwarire idahwitse, ashobora guhagarikwa mu kazi cyangwa akirukanwa burundu, hakurikijwe amategeko abigenga.

Mu ijambo ryagejejwe ku bitabiriye inama, Umuyobozi Nshingwabikorwa w’Akarere ka Gasabo yagaragaje ko itegeko rigenga imyitwarire mbonezamurimo rigomba kubahirizwa. Yongeyeho ko abakozi bagomba gukorana ubunyamwuga, bagashyira umutima mu kazi bakora, kandi bagaharanira guteza imbere imiyoborere myiza binyuze mu gutanga serivisi zinoze. Yabasabye kwihugura no gukomeza kwiga kugira ngo barusheho kunoza imikorere yabo.

Iyi nama yanagarutse ku kibazo cy’amasaha y’ikirenga akorwa n’abakozi, aho bamwe bagaragaje ko inshuro nyinshi bakora amasaha arenga ayateganyijwe bitewe n’inshingano zabo. Byavuzwe ko iki kibazo kizakurikiranywa kugira ngo hashakwe uburyo bwiza bwo kugikemura.