Kuri uyu wa Gatatu, tariki ya 19 Gashyantare 2025, mu Karere ka Gasabo habereye inama yateguwe na Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) ku bufatanye n’Akarere ka Gasabo. Iyo nama yari yitabiriwe na Perezida wa Ibuka, Umunyamabanga Mukuru wa AVEGA ndetse n’abagenerwabikorwa batandukanye. Iyo nama yari igamije kuganira ku mitangire n’imikoreshereze y’inkunga zigenerwa abarokotse Jenoside yakorewe Abatutsi muri mata 1994. 

Muri ibyo biganiro, hagarutswe ku nkunga zitandukanye zirimo izo mu buvuzi, uburezi, inkunga y’ingoboka, izifasha imishinga ibyara inyungu, ndetse n’inkunga y’amacumbi. Hanagaragajwe inzitizi zikigaragara mu gutanga izo nkunga, aho usanga zidahabwa abazigenewe uko bikwiye. Byagarutsweho ko uburyo bwo guhitamo abazihabwa bukwiye kunozwa, hakitabwaho cyane abakeneye ubufasha kurusha abandi kandi hagendewe kuburyo busobanutse. 

Umuyobozi Nshingwabikorwa w'Akarere n'Umuyobozi w'Ibuka mu Karere ka Gasabo

Perezida wa Ibuka yagaragaje ko ikibazo cy’amacumbi kikigaragara cyane, asaba ko abayakeneye begerezwa ubufasha kuko hari abatishoboye baba bakeneye abababa hafi, Yavuze ko mu gihe hagaragara urutonde rw’abemerewe inkunga, hakwiye kwitabwaho no ku bandi bafite ibibazo bikomeye kugira ngo hatagira usigara inyuma. 

Muri ibi biganiro hanagarutswe ku bibazo by’ubuzima bwo mu mutwe ku barokotse Jenoside, by’umwihariko ihungabana n’agahinda gakabije. Byagaragajwe ko hakenewe ubufasha buhamye, haba mu rwego rwo kubegera no kubaha umwanya wo kuganirizwa, ndetse no gushyiraho uburyo bufasha imiryango yabo gukomeza kubitaho no kubakurikirana.

Abitabiriye inama