Ubuyobozi bw'Akarere ka Gasabo  ku bufatanye n'abafatanyabikorwa muri Malaria batangije  Ubukangurambaga bw'iminsi 14  bwo kurwanya Malaria.Twese hamwe dufatanye, turandure Malariya mu ngo zacu.

Akarere ka Gasabo kari mu turere twambere dufite abarwayi ba Malaria, Umurenge wa Kinyinya ukaba ariwo wambere ufite abarwayi ba Malaria.

Kurandura Malaria bitangirira kuri Njye.

• Muri iyi minsi 14 hazakorwa ibikorwa bitandukanye bigamije kwibutsa abaturage kwirinda Malaria, kuyipima, gutanga inzitiramibu no kwigisha abaturage uko Malaria yandura, Gukurikirana ko imiti ya Malaria  itabura mu bajyanama b’ubuzima, Gutanga inzitiramibu ku miryango ikennye cyane , Ibikorwa by’Umuganda udasanzwe wo gukuraho ubwororokero bw’imibu n’ibinogo birekamo amazi, Ubukangurambaga bw’ abaturage mu kugira uruhare rwo kwirinda indwara ya Malaria cyane cyane ahahurira abantu benshi (inteko z’abaturage, amasoko..) 

Mu ijambo rye, Umuyobozi Nshingwabikorwa w'Akarere yasabye buri wese kugira uruhare mu kwirinda no Kurwanya indwara ya Malaria kuko malaria ari indwara ishobora kudusubiza inyuma burundu, kuko iyo itakwishe irakuzahaza, bityo n’ubukungu bw’umuryango n’Igihugu bigasubira inyuma. Turamutse twese dufatanyije, nta mwana cyangwa umubyeyi wakongera kurwara cyangwa gupfa yishwe na malaria.

Umuyobozi w'Umujyi wa Kigali  wungirije Ushinzwe Ubukungu n'Imibereho y'abaturage  atangiza ubukangurambaga bw'iminsi 14 yo kurwanya Malaria, yavuze ko Uturere tw'Umujyi wa Kigali twose turi imbere mu bafite abarwayi benshi ba Malaria asaba abaturage gukaza ingamba zo kwirinda Malaria, ashima kandi Ubuyobozi bukuru bw'Igihugu cyacu cyita ku mibereho myiza y'abaturage kigashyiraho uburyo bwo gufasha abaturage cyane cyane abatishoboye.

Muri ubu bukangurambaga, hehembwe bamutwarasibo mu mu Murenge wa Rutunga yamaze kwishyura Mituweli y’umwaka utaha 2025-2026.